ठाणे : कौटुंबिक परिस्थिती अत्यंत हलाखीची असलेल्या साहिल संजय या ठाण्यातील विद्यार्थ्याने दहावीच्या परीक्षेत ९४ टक्के यश मिळवले आहे. त्यामुळे त्याच्यावर कौतुकाचा वर्षाव केला जात आहे. तो बबनशेठ पडवळ विद्यालयाचा विद्यार्थी आहे.
त्याची सातवीची परीक्षा सुरू असताना त्याच्या वडिलांचे निधन झाले.
त्या वेळी तो वडिलांवर अंत्यसंस्कार करून तसाच परीक्षेला गेला होता. त्याही वेळी तो वर्गात पहिला आला होता. त्यानंतर त्यांच्या कुटुंबाची परीक्षाच सुरू झाली. उजाडणाऱ्या प्रत्येक दिवशी येणारे नवे आव्हान स्वीकारत त्याने पुढची वाटचाल सुरूच ठेवली. त्याच्या घरात एकटी आईच कमावणारी; मात्र साहिलने दहावीत उज्ज्वल यश मिळवून तिची मान उंचावली आहे.
साहिलच्या आईने एकाकी झुंज देत साहिलची मोठी बहीण सायली आणि साहिलचं शिक्षण चालू ठेवलं. दररोज अडचणींवर मात करून मिळणाऱ्या तुटपुंज्या सुविधांचा बाऊ न करता चमकलेल्या इच्छाशक्तीला ठाणेकरांनी सलाम केला आहे. साहिल अष्टेडो या खेळातला राज्य पातळीवरचा खेळाडूही आहे. आजवर त्याच्या नावावर तीन जिल्हास्तरीय सुवर्णपदके असून, राज्य संघातही तो खेळला आहे.
